الشيخ : نعم نعم
السائل : السلام عليكم
الشيخ : وعليكم السلام
السائل : بالله سؤال يا أخي الكريم
الشيخ : تفضل
السائل : أنا بشتغل لحّام
الشيخ : نعم
السائل : وأواعيّ بينتلوا دم ودم كتير
الشيخ : آه
السائل : أصلي فيهم ولا أروح أغيّر لأنو سألت شيخين وواحد قلي بهمّش صلي وواحد قلي لأ تصليش روح غيّر , .. الأفضل
الشيخ : الأفضل وين بدك تصلي
السائل : ساكن بجبل النصر
الشيخ : وين بدك تصلي
السائل : ها أصلي الظهر
الشيخ : وين بدك تصلي وين في مكانك في بيتك في المسجد وين بدك تصلي
السائل : في الجامع
الشيخ : في الجامع ؟
السائل : القريب عليّ
الشيخ : كويس فالأفضل متل ما قلّك هاللي أفتاك بأنو تغير لباسك , وأنت لازم في محلك تحط عباية تشلح الثياب المدممة وتتعبا بالعباية وتروح إلى المسجد , وبس ترجع من المسجد بترفع العباية وبتلبس لباس الجزارة , أما إنك تروح بالثياب المدممة إلى المسجد وريحتك ريحة دم ولحم هذا فيه إيذاء للمؤمنين والرسول صلى الله عليه وآله وسلم حذّر المصلين أن يؤذي بعضهم بعضا بأقل من هذا الإيذاء حيث قال عليه الصلاة والسلام ( يا أيها الناس كلكم يناجي ربه فلا يجهر بعضكم على بعض بالقراءة فتؤذوا المؤمنين ) يعني الناس إما عم يصلوا السنة مثلا أو عم يقرؤوا القرآن أو عم يصلي عالرسول عليه السلام فواحد منهم برفع صوتو لما عم يقرأ هادا بيشوش على من حوله وبيؤذيهم فنهاه الرسول أن يرفع صوته بالقرآن لأنو بيؤذي المؤمنين , يا ترى الإيذاء بتلاوة القرآن أشد ولا الإيذاء من اللحام بالدماء لا شك هذا أشد إيذاءً , لذلك فعليك أن تتخذ عباية أو لباس نظيف خاص بتلبسو لما بتروح تصلي في المسجد وبتنزع الثياب المدممة وبعدين بترجع وبتلبسها هذا هو الواجب عليك
السائل : طب يا سيدي مهي المسافة بعيدة بدي حوالي نص ساعة لما بدي أروح أغير وأرجع
الشيخ : هذي مسألة تانية , أنا ليش سألتك وين بدك تصلي
السائل : الجامع مهو جنبي طب ولو بدي أصلي في نفس المحل أو عند جيراني
الشيخ : ما دام عم بتقول المسجد بجنبك
السائل : بجنبي المسجد , مهو بديش أضيع نص ساعة على جبل النصر وأعاود أرجع
الشيخ : اسمع يا أخي الله يهديك المسجد بجنبك جنب البيت ولا جنبك في اللحام
السائل : جنب المحل جنب اللحمة
الشيخ : أي عم أقلك الله يهديك حط عباية بالمحل
السائل : بنحط عباية
الشيخ : أي وليش عم تقول مسافة نص ساعة
السائل : طيب لو كانت شغلات خفيفة بس أجا عليها شغلات خفيفة بس إللي ما بتئذي حد
الشيخ : المهم يا حبيبي إنك ما تؤذي المؤمنين بالريحة الكريهة وبالمنظر الكريه , فإذا كانت هناك نقطة أو نقطتين ما في إيذاء ما في مانع فالعلة هو الإيذاء فإنت بقا بتعرف إن كانت ثيابك مدممة بصورة تؤذي فالجواب ما سمعت وإذا كان عبارة عن قطرة وقطرتين فلا عليك بتروح المسجد وبتصلي والسلام عليكم
السائل : طيب يا سيدي الله يبارك فيك
الشيخ : الله يحفظك أهلا وسهلا
السائل : طبعا الدنيا ثلاثا والشغل بجوز إنسان يطول بشغلته معاي وأذن الآذان ومرحتش أصلي وراحت علي صلاة الظهر
الشيخ : ما أمكنك لا يجوز إلا أن تصلي مع جماعة المسلمين ولو قلت للزبون من فضلك إرجع إللي بعد ربع ساعة أنا الآن بدي لحق الصلاة والسلام عليكم
السائل : طب لو راحت علي الصلاة ومقدرتش
الشيخ : بس يا أخي كم سؤال بدك تسأل نحنا عم نسمح للناس سؤال واحد إنت الآن سألت ثلاثة أسئلة
السائل : الله يبارك فيك
الشيخ : خبّي سؤالك لغدا إن شاء الله والسلام عليكم
السائل : وعليكم السلام